Preso arrasatearrak eskutitzean dio “borrokaldia” abiatu aurretik hainbat saiakera egin dituela gainontzeko kolektiboko kideengandik isolaturik ez egoteko; haren esanetan Villepinteko zuzendaritzarekin hiru aldiz bildu da eta Le Vert epailearekin abokatuen bidez jarri da harremanetan. Kasu guztietan, eskaera argia egin die presoak: “Villepinteko espetxera beste kide bat ekartzea; edo ostantzean, kideak dauden beste espetxe batera mugitzea”. Hala ere, oraingoz ez du arrakastarik izan eta honela mintzatu da bere gutunean: “dagoeneko hiru hilabete pasatu dira, hiru hilabete luze kideen berotasuna sentitu gabe”.
Hori dela eta, Arkauzek adierazi du, espetxealdia zigor ziega batean emango duela, bere aldarrikapena “aintzat hartua izan arte”. Horrez gain, bere protesta are gehiago zabaldu eta indartzeko, Arkauzek dei egiten du Villepinteko espetxeko zuzendaritzara zein Le Vert epailearen bulegora gutun bidalketa herritarra egiteko. Horrela, “ahalik eta oihartzun handiena lortzea” du helburu. Dena den, egoerak bere horretan luze jarraitzen badu, Arkauzek esan du “borrokaldia gogortu eta beste fase batean sartzeko prest” dagoela.