Udalak animaliendako gune berriak prestatu eta hiri inguruan haien baldintzak hobetu gura ditu. Hala, proba pilotu moduan hiru gune irekiko dituzte, txakurrak aske ibiltzeko (arriskutsuak diren txakurrak beti joan behar dira lotuta eta muturrekoaz): Deba Ibaia kalean –Mankomunitatearen atzealdean, argazkian–, Zalduspe kalean –ospitale berriaren atzealdean– eta Gorostizako beheko landetan. Hiru guneak mugatutako berdeguneak izango dira, txakurrek jolas egiteko nahikoa lekurekin.
Informazio kanpaina jabeendako
Txakurren, txakur jabeen eta gainerako herritarren arteko elkarbizitza bultzatu gura du Udalak, eta horretarako informazio kanpaina bat abiatu du txakur jabeei ze betebehar dituzten gogorarazteko. Jabe guztiei etxera bidali zaie gutun bat, euren erantzukizunak zeintzuk diren azalduz eta indarrean ze araudi dagoen gogoraraziz.
Erantzukizunak "ganoraz" bete
Iraila eta urrian zehar, gainera, udaltzainek bereziki zainduko dute txakur jabeek oinarrizko arauak betetzen dituzten ala ez: "Udalak nahiko luke txakur jabeek euren erantzukizunak ganoraz betetzea, indarrean dagoen zigor araudi zorrotza aplikatu behar izan barik". Araudi horren adibideetako bat: kakak jasotzen ez dituztenek 30 eta 300 euro arteko isuna ordaindu beharko lukete.