Hezkuntza folklorearen eta kulturaren bidez ulertzen dute han eta horregatik ikuskizunaren parte izango dira, besteak beste, lurraldeko dantzak, Poloniako ohituretan oinarritutako antzezlanak eta Eguberriarekin zein Pazkoarekin zerikusia duten jarduerak. Hainbat hezkuntza-programa ekoitzi dituzte eskolako umeendako, eta hiriburuko ohitura eszenografiak ere sortu izan dituzte.
Ospe handiko ikuskizuna
Goi mailako ikuskizuna denaren adierazle, ospe handiko jaialdietara gomendatu izan dute, Polonian bertan zein nazioartean. Beraz, munduko hainbat txokotan ezagunak dira ekarri ohi dituzten Poloniako jantzi ederrak –Polonian eginak–, kantu liluragarriak eta dantzak. Bisitatutako herrialdeen zerrenda luzea da oso: Bulgaria, Belgika, Frantzia, Grezia, Herbehereak, India, Japonia, Kanada, Mexiko, Alemania, Taiwan, Turkia, AEB, Britainia Handia, Italia, Espainia...
Beraz, gaur arrasatearrek izango dute aukera ikuskizun eder horrekin gozatzeko. Kalean bertan eta doan, Udazabal ekimeneko eskaintzak dituen bereizgarriak dira-eta.