Muturrak txokolatez zikindu eta tripa bete ostean, salto eta brinko ibili ziren gaztetxoak puzgarrietan. Zazpiretan "bolo-boloaren" txanda iritsi zen. Plastikozko poltsak eskuetan hartu eta ume mordo bat bildu ziren leiho baten azpikaldean, bertatik jaurti zituzten ehundaka goxoki eta karamelo hartzeko prest. Nor baino nor arinago, emoziozko oihuekin bildu zituzten ingurura eroritako opari guztiak. Hamabost minutuan bukatu zuten dena, baina lurra garbi-garbi geratu zen. Hori bai, hasieran hutsik zeuden plastikozko poltsak goraino beteta.
Apur bat nagusiagoentzat, Electrogaia 2014 jaialdiak hartu zuen protagonismoa, bailarako sei punk kontzerturekin. Musikariak eta publikoa, pozik eta antolakuntzari eskerrak emanaz: "antolakuntzak oso lan polita egin du , oso ondo pasatu dugu", zioen Josu Basterra WC taldeko abeslariak.
