Musakolako igerileku txikia itxita egongo da gaur eta bihar, "segurtasuna bermatzeko"

Jokin Bereziartua Lizarazu 2014ko uzt. 7a, 13:13

Udaleko hiru langile igerileku txikia garbitzen.

Arrasateko Udaleko Kirol Zerbitzuak jakitera eman du gaur eta bihar itxita egongo dela Musakolako igerilekua txikia. Azken egunotako arazoak direla-eta, erabaki dute zoruko baldosa txikiak ondo lotzea: "Ez da normala horrenbeste zauri eta ebaki gertatzea; horregatik igerilekua itxi eta segurtasuna bermatzea erabaki dugu". Eguraldi iragarpenak eskasak direla aprobetxatu dute lanok egiteko. Etzi, eguaztena, irekiko dute berriro.

Zoruko baldosa txikiez aparte, aurten jarritako txirrista berriak ere eragin ditu zauriak: "Erreklamazioa jarri diogu txirrista saldu zigun enpresari baina oraindik erantzunaren zain gaude. Betikoa da; bitartekariak daude eta horrek dena atzeratzen du", adierazi dute kiroldegiko arduradunek.