Goizeko 10:00etan hasi da Ttakun Elkarteak antolatutako Txalaparta Eguna. Aurten, txalapartari bikote banak ordu berdinean eta toki desberdinetan txalaparta joaz hasi dute eguna. Talde bat Santa Barbaran eta bestea Altamirako igogailuan, gure arbasoek egiten zuten gisan, batetik besterako komunikazioa irudikatu dute, horrela.
Herriko plazan saio libreak egiteko aukera eman dute segidan. Gura izan duten herritarrek txalapartaren oinarrizko ezagutzak jasotzeko modua izan dute. Txorizoa eta sagardoa ere atera dituzte, nola ez, eta pixkanaka pixkanaka, hasia da Arrasateko plazan, giroa berotzen.
Eguerdi inguruan irrintzilariak hasi dira euren saioa egiten eta ondoren, herri bazkaria egin dute Udalpe elkartean. Arratsaldean tabernaz-taberna egin zituzten txalaparta saioak, ikus-entzuleak erakarriz eta giro polita sortuz.