Txosna batzordeak ez du joan den hilaren 24ko gertaera publikoki zehaztu gura izan: "Ez dugu zehaztasunik eman nahi, neskaren datuak babesteko eta gertaera isolatua ez dela argi uzteko. Ez diogu gertaerari berari garrantzia eman nahi, gure asmoa da txosnagunea gune aske bat dela eta halakorik onartuko ez dugula ozen esatea. Hemen denok eroso egon gaitezen egiten dugu lan eta batez ere gerora halakorik ez dadin errepikatu", adierazi du Txosna batzordeko kide Ane Zuazubiskarrek.
Protokoloa, zehaztuta
Era berean, protokoloa zein den azaldu du Zuazubiskarrek: "Pertsonaren bat erasoren bat jasaten badu hari lagundu eta benetan zer gertatu den azaldu behar dugu. Laguntza behar duela dioenean, larrialdietarako bi zenbaki ditugu eta bertara deituko genuke berehala. Larrialdietako zerbitzuek badakite nola jokatu, gu baino esperientzia handiagoa dute honetan". Txosnetan bertan dago telefono bat: 943 25 20 10
Jende asko
Txosnagunea goraino bete da elkarretaratzean; Zuazubiskarren arabera, ez da gutxiagorako: "Normala da jende asko etortzea, gertaera oso larria da-eta. Jaiak denondako dira eta denok dugu eskubidea gozatzeko. Jendeak erantzun behar zuen, eta erantzun du".
