Euskadiko Orkestra Sinfonikoa Aita Menni Ospitalean arituko da, bihar

Kontzertua 16:30ean hasiko da, osasun-zentroko ekitaldi-aretoan, eta sarrera librea eta doan izango da. Lorenz Nasturica-Herschcowiciren zuzendaritzapean, taldeak Beethovenen Bosgarren Sinfonia joko du. Aita Menni Ospitaleak San Benito Menniren heriotzaren 100. urteurrena dela eta antolatutako jardueretako bat da. ‘Orkestra Herrietan’ programan kokatuta dago, eta horren bidez, Orkestrak bere inguruko lekuetarako eramaten du musika, kontzertuen ohiko zirkuitutik kanpo.

Hori horrela, Arrasateko auzokoek, zentroko pazienteek eta profesionalek taldearen emanaldiaz gozatzeko aukera izango dute. Aita Menni Ospitaleko Pastoraleko burua, Egoitz Zabala, izan da jarduera antolatu duena, eta eskerrak eman dizkio Euskadiko Orkestra Sinfonikoari Aita Menni Ospitalera berriro etortzeagatik, bere musikaz gozatu ahal izango baitute. “Zuzendariaren kargua utzi duen Iñigo Alberdiri bereziki eskertzen diogu, beti lagundu duelako taldea gurera etor zedin, eta dagoeneko hirugarren aldia da etortzen dena", adierazi du. Horrez gain, bisitaren asmoa, kultura-proposamen hau, normalean gozatzeko aukera ez duten taldeengana heltzea dela azaldu du. “Gure kasuan, gaixotasun mentalak dituzten pertsonen, adinekoen eta garuneko kaltea duten pertsonen mundura heltzea da helburua”.

Euskadiko Orkestra Sinfonikoa

Estatu mailako erreferentziako talde sinfonikoa da, eta 7.000 abonatu ditu.  Bere saioetan % 90eko okupazioa lortzen du eta urtero 150.000 ikusle inguru ditu. ‘Orkestra Herrietan’ ekimenari esker, bere inguruko lekuetara eramaten du bere musika Euskadiko Orkestra Sinfonikoak, kontzertuen ohiko zirkuitutik urrun. Oraingoan, goi-mailako proposamena du: Beethovenen Bosgarren Sinfonia.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.