Mondraren mendeurrena (1913-2013) dela-eta antolatutako ekintzen emaitza moduan aurkeztu dute Mondraren liburu, udaletxeko osoko bilkuren aretoan.
Istorioak eta argazki zaharrak
Gustura azaldu dira emaitzarekin John Andueza egileetako bat eta Fernando Laspiur urteurreneko ekintzen antolatzailea. Biek ala biek esan dute liburu arina eta dibertigarria dela, argazkiz eta istorioz betetakoa. Hain zuzen, argazki zaharrak batzen ditu liburuak. Lehen ediziorako 700 ale atera dituzte.
Liburuarekin batera, aurrez egindako DVDa ere badator. Oihan Vitoriak eta Jokin Uribetxeberriak iaz egin zuten dokumentala ikus daiteke lan horretan.
Udalaren diru-laguntzari esker izan da posible liburua argitaratzea eta horregatik egin dute aurkezpena udaletxean. Hain zuzen, Laspiurrek eskerrak eman dizkio udalari emandako laguntzagatik.
Andueza eta Porcelen lana
John Andueza eta haren emazte Marian Porcel izan dira liburuaren egileak. "Jende asko dago liburu honen atzetik. Batetik, argazkien jabeak daude; horietako batzuk orain 80 urte dituzten jokalari ohiak dira. Bestetik, argazki horien bila norengana jo genezakeen esan ziguten pertsonak ere badaude. Hala ere, sekulako lana egin duena, John Andueza egileaz gain, Marian Porcel izan da. Argazkiak identifikatzen, sailkatzen eta aukeratzen lan itzela egin du", azaldu du Laspiurrek. Berau eta Jose Luis Ezkurra ere buru-belarri aritu dira proiektu honetan.
Anduezak esan du zaila dela 100 urteko historia liburu bakarrean laburbiltzea eta horregatik istorio dibertigarrienak jasotzen saiatu direla. Laspiurrek honakoa ere gaineratu du: "Liburua, ikusi eta irakurtzeko erraza izateaz gain, haren gainean berba egiteko aproposa da. Aspaldiko pasadizoekin momentu eder batzuk pasatzeko aitzakia ematen du".
Liburuaren aurkezpenarekin amaitutzat eman dituzte mendeurrenaren harira antolatutako ekitaldiak.
Zapatuko Ardo Egunean salgai
Gaurko ekitaldiaren ostean saldu dituzte lehen aleak. Liburuak eta DVDak –liburu barruan doa ikus-entzunezkoa– 20 euroko prezioa du. Erosketa gaur egin dutenei Mondrako bufanda eman diete opari. Bestalde, gaur erosi ez duenak zapatuko Ardo Egunean izango du horretarako aukera, goiz eta arratsalde. Era berean, Itzala, Kajoi eta Monte tabernetan ere egongo dira salgai.
Kaleratu berri duten produktuaren helburua zein den argi dute guztiek: "Mondrarendako diru-iturri izan dadila".