Lan berria aurkeztuko du Yakuzas-ek Gaztetxean

Garage eta punk doinuek hartuko dute gaur gaztetxea (22:00) Sumision City Blues eta Yakuzas taldeekin. Gitarrak mezuak bezain zorrotz, grina erakustaldia izango da gaurkoa.

Sumisión City Blues, Gasteiztik, Golden izeneko disko berriarekin itzuli da taldea oholtza gosez, eten baten ostean. Bi munduren arteko talka batek bereizten du gasteiztarren soinua, jazz munduko musikariak rockaren izerdiak zaildutako kideekin egiten du-eta bat Sumisión City Bluesen. Bazterkeria eta injustiziari rockezko amorruz erantzuten dio taldeak eta ezer baino lehen abestiak, indarra eta mezua jartzen duen taldea da. Obligacioneseko Pela da bandaren gidaria eta inor epel ez uzteko moduko jarrerarekin aurkezten den horietakoa da. Madrildik Yakuzas garage estiloko taldea etorriko da. Espainiako hiriburuko Chamberí auzoko rock-and-roll kolpagarri zein castizo-a da eurena eta apirilean labetik atera berria dute Matogrosso EP-a eta aurkezpen birako bigarren emanaldia izango da Arrasaten egingo dutena. Ibarrean jardun bikoitza egingo dute eta domekan, barikukoa galdu ala errepikatu gura dutenentzat, Oñatiko Pako-n ere joko dute.

Eskulanak zapatuan

Asteburuko jarduerei dagokienez, bihar zapatua, tailerra egingo dute gaztetxekoek. Birziklatutako gaiak erabilita sormen tailerra antolatu dute (17:30). Lepokoak, apaingarriak edo, besteak beste, diru-zorroak egiten erakutsiko dute gazteek eta deialdi irekia egiten dute nork bere sormena askatu eta eskulanean jarduteko. Asteburukoekin batera AGAKOk domekako Gure Esku Dago ekimenaren giza-katera batzeko deiarekin ere egiten du bat.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.