Jendez gainezka egon da Iturripe, saskibaloi zaleek Ointxekoek egindako deialdiari ondo baino hobetu erantzun diote, eta amaiera zirraragarri zein arriskutsuan ezinbesteko laguntza helarazi diote taldeari. Amaitzeko bi minutu eta erdi geratzen zirenean puntu bakarreko aldea zuten arrasatekoek (64-63), baina erasoan akats bat egin ostean, Tabirako aurreratu da markagailuan; hil ala biziko momentua zen eta tentsio handiko momentuak bizi izan dira Iturripen.
Eraso eta defentsa nahasiak izan dira hurrengoak baina momentu beroenean, 42 segundoren faltan, bi puntu atzetik zihoazen etxekoak (66-68) eta Kintanaren (27 puntu) hirukoak aurretik jarri ditu Larreategirenak eta zutik ikusleak.
Partidu zaila aurreikusten zen eta horrela izan da. Norgehiagoka serio jokatu du taldeak, hala ere, markagailuan atzetik joan dira bigarren laurdeneko zazpigarren minutura arte. Talde guztiak gogor borrokatu du, baina aipatzekoa da Iker Barberok egin duen lana; 17 puntu, hamar errebote eta bi txapel egin ditu.
Lehenengo laurdena ez dute ondo hasi etxekoak, hala ere, ez dute esperantza galdu eta atsedenaldira markagailuan aurretik iritsi dira (39-37). Aldagelatik bueltan, bi taldeek argi utzi dute garaipena zela helburu bakarra eta gogor borrokatu dute biek.
Hirugarren laurdenean, hamar puntuko aldea lortu dute etxekoek, hala ere, defentsan falta asko adierazi dituzte epaileek eta Tabirako taldeko Larrañaga joko antolatzaileak ez ditu desprobetxatu jaurtiketa libreak; azken laurdenean dena zegoen erabakitzeko.
Neskei omenaldia
Partidua hasi aurretik, Alebin mailako neskei omenaldia egin diete, Gipuzkoako txapeldunak izan dira-eta.