Herri Artekoa hasiko dute gaur Uarkapen

Herri Arteko Pilota Txapelketari ekingo diote gaur herriko pilotariek. Gipuzkoa mailako lehiaketa da eta Astigarragaren aurka neurtu beharko dituzte indarrak etxekoek. Hiru mailatan arituko dira: kadete, gazte eta seniorrak. Beraz, hiru norgehiagoka ikusteko aukera izango da gaur, 19:45ean hasita, Uarkapen. Kadete mailan, Ander Murua eta Markel Moron izango dira herriko ordezkariak; gazteetan, Josu Egia eta Joseba Garate; eta seniorretan, Ibai Bolinaga eta Aritz Zuazua.

"Pilotari onak ditugu, lehiatzeko modukoak. Azken bi urteetan txapelketa irabazi zuten herriek kanporatu gintuzten [Hernanik orain dela bi urte eta iaz Oiartzunek]. Ikusi egin behar aurten noraino iristen garen...", esan du pilota saileko presidente Alberto Garatek. Eta gaineratu: "Urteko txapelketa garrantzitsuena eta politena da. Izan ere, herrien arteko lehia izaten da eta emozio dezente izaten da". Horrenbestez, jendea animatu nahi izan du pilotalekura.  

Asteburu honetan Arrasaten jokatuko dira partiduak eta hurrengoan Astigarragan. Puntu gehien eskuratzen dituenak lortuko du aurrera egitea.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.