79-68 galdu bazuten ere, egindakoarekin pozik daudela azpimarratzen du Josu Larreategi entrenatzaileak taldea prest ikusten baitu datorren asteburuko partiduetarako. Lesiorik ez, proba batzuk eginda eta sailkapenerako eraginik ez zuenez, arrasatearrak ez ziren Ordiziara aldarte lehiakorrarekin joan. Presio hori kenduta, aukera izan zuten probak egiteko. Hain zuzen Arrasaten asteburuan Tabirako, Azpeitia eta Deustuko taldeekin jokatuko duten Laukoa prestatzen emango dute aste osoa. Lehenengo durangarrak izango dituzte aurkari Larreategiren mutilek eta aitortzen du "aspaldiko ezagunak" eta "gogorrak" direla. "Halako torneotan jokalariek oso ondo jakin behar dute euren lana egiten eta presioa behar da",dio. Euren jokoari dagokionez, "sorpresarik ez" dela egongo aurreratzen du Larreategik eta defentsari tinko helduko diotela dio. Konfiantza osoa du hark hala egingo dutela.