Arrasateko Musakola auzoko Santa Teresa herri eskolako ikasleek egitarau berezia izan dute gaur eskola orduetan. San Isidro jaiak direla eta, goizean, buruhandien bisita izan dute eskolako bi eta 6 urte bitarteko 80 haurrek. Buruhandi lanak egiteaz arduratu dira Lehen Hezkuntzako seigarren mailako auzoko gazteak. Trikitilariak ere egon dira eskolan, eta Piñatak izan dituzte jolasteko. Arratsaldean, jolas herrikoiak eta merendola izango dituzte. Lourdes Madinabeitia irakaslearen esanetan, eskolako ekintzen bitartez auzoan jai giroa bultzatu nahi dute.
Arizmendi ikastolako ikasleek ere jaiei hasiera eman diete, gaur goizean. Marrazki lehiaketarekin ekin diote egunari. Goizean, San Isidro jaiak gai izanik marrazkiak egin dituzte, eta beraiek erabaki dute irabazleak zeintzuk diren; sari banaketa egin dute ondoren. Danborrada, eguneko ekintza nagusia, hamaiketan hasi da. 220 gaztek hartu dute parte, eta Musakolan zehar itzulia egin ondoren, Egoitzan bukatu dute ibilbidea gozoki banaketarekin. Nerea Gabilondo irakasleak adierazi du, haien helburua dela danbor hotsekin auzoko kaleak kantuz alaitzea.