Kalitateak eta sentimenduak bat egin zuten Iluntz tabernan

Iluntz tabernan sartu aurretik, kaletik Robert Johnson edo Little Walter bluesman mitikoen diskoa jarrita zegoela iruditu zitekeen arren, Edu Manazas eta Marcos Coll ziren oholtza gainetik ongi etorria emateko arduradunak.

Biak ala biak maisu norberaren instrumentuarekin; gitarra hartuta eta ahots urratuarekin lehena eta armonika eskuetan zuela bigarrenak, Chicago, Illinois zein Orleansera eraman zituzten tabernako ikusleak. Blues errezitaldi bikaina eskaini zuten bikote bezala musikari madrildarrek eta publikoa irribarretsu utzi zuten ordu eta erdiko emanaldia amaitzerakoan, batzuk gehiagorako gogoz tartean. Bi musikariak kalitatearen segurtasun dira, hainbat urte daramatzate errepidean, eta horrek musika egiteko orduan kalitatea bai, baina kontzertu bat aurrera eramateko segurtasuna ere eman die. Hasieratik Iluntzeko publikoarekin jolasean aritu ziren, eta benetako ikuskizuna oparitu zieten.

Gaur Pako tabernan

Gaur Oñatiko Pako tabernan eskainiko du kontzertua bikoteak, 19:30ean. Atzokoan kale egin zutenentzako aukera bikaina izango da gaurkoa; nazioarteko maila duten bluesman-ak gurean ikusteko aukera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.