Sailkapeneko hamabigarren postuan dago La Peña Basket eta fisikoki talde gogorra da. Azkenaldian bizkaitarrek ez dute partiduak irabazten asmatu, baina horrek ez du esan gura biharko norgehiagoka erraza izango denik.
Hain zuzen ere, azken unera arte borrokatzen duten talde horietakoa da Bilbokoa. Lehen itzulian MUk La Peña Basketen kantxan jokatutako partiduaren amaieran, esate baterako, 67-78 emaitza erakutsi zuen markagailuak.
Sei partidu aurretik
Momentu honetan Larreategiren taldea bigarren postuan dago sailkapenean, eta, biharko partiduarekin, arrasatearrek sei norgehiagoka jokatu beharko dituzte liga amaitu bitartean. "Ahalik eta jokorik onena eginda, partiduz partidu irabazten joateko helburua dugu", dio Larreategik. Izan ere, modu horretan, sailkapenean lehenengo doan Bide-Bide Donosti taldearen aurkako partiduaren ordua iristen denean –maiatzaren 10ean– txapelagatik borrokatu gurako lukete.
Bestalde, aurreko astean, igoera fasea jokatzeko txartela ziurtatu zuen MUk.