Carrascoren emazte, alaba, ama, eta gainontzeko senitartekoek, Alderdi Sozialistako euskal exekutibako kideak eta Arrasateko zinegotziak izan zituzten lagun. Oinez egin zuten Navas de Tolosa kalean barrena aurrera, lora sortak eta arrosak eskuetan, duela sei urte ETAk Carrasco hil zuen tokiraino bertaraino. Han, lurrean, hunkiturik, lora sortak eta arrosak eskaini zizkioten Isaias Carrascori.
Lore eskaintzaren ostean, Patxi Lopezek, PSEko idazkari orokorrak, eta Carrascoren alaba nagusienak hartu zuten hitza. Lopezek esan zuen Carrascoren "delitu bakarra askatasuna eta sozialisten ideiak defendatzea" izan zela. Gaineratu zuen hura hil zutenak garaitu arren oraindik bide luzea geratzen dela: "Terroristak garaitu ditugu. Askatasuna lortu dugu. Baina, oraindik, elkarbizitza lortu behar dugu. Egia lortu behar dugu".
Alabak aldiz bi zatitan banatu zuen bere hitzaldia. Egun Euskal Herrian bizi den egoeraz mintzatu zen Sandra Carrasco eta Parot doktrina ere aipatu zuen. Carrascok azaldu zuenez, legeak errespetatu behar diren arren, guztiekin ez dator bat, "hiltzaile bat heroi bezala, kalean uzten duen lege batekin ez naiz bat etorri". Ekitaldia alaba nagusiak aitari zuzendutako hitz hunkigarri batzuekin amaitu zen.
