Idazkariak mozioa irakurri ostean, PSE-EEko bozeramaile Aritz Arrieta izan da interbentzioa egin duen bakarra. Legea indarrean jartzen bada, sozialistak gobernura heltzen direnean indargabetuko dutela adierazi du, besteak beste.
Udal Gobernua, "pozik" akordioarekin
Osokoa amaitu ustean Udal Gobernuko bozeramaile Maider Morrasek esan du "pozik" daudela talde guztiek bat egiten dutelako: "Oso ondo baloratzen dut akordioa. Lege egitasmo honek ez du erabateko babesa, ezta PP barruan ere. Oso gutxi kostatu zaigu akordiora heltzea, gutxi gorabehera denok gindoazelako ildo berean. Alde horretatik pozik gaude; baina kezkatuta ere bai, beste aldetik".
"Atzerakada handia"
Morrasen arabera, abortuaren gainean erabakitzeko eskubidea "ezin da Estatuaren edo medikuntzaren eskuetan" geratu eta gaineratu du "nahikoa lan" egin duela mugimendu feministak emakumeak haurra "noiz izan edo noiz ez" erabakitzeko eskubidea izan dezaten. Esan du, era berean, lege egitasmo horrek "atzerakada handia" suposatzen duela.
