"Azken urtean, parte hartzaile kopurua erdira jaitsi zen", argitu du Iñaki Gurrutxaga Harristi-k, Aratusteetako Jai Komisioko kideak.
Oraingoz, erabakia ez da behin betikoa eta aurtengo erabakia "proba" modura hartu dutela azaldu dute. "Herriko ekonomia sustatzeko egin dugu; lehen herri bazkarira joaten zen jendea orain herriko taberna eta elkarteetan batuko da, eta diru guztia herrian geratuko da", esan du Harristi-k. Horren ostean, beste azalpen bat ere eman du: "Bazkariaren prezioa garestia zela esaten ziguten, eta zoritxarrez herrian langabe gehiago dagoenez, diru apur bat aurrezteko ere hartu dugu neurri hau".
Aurtengo herri bazkaria bertan behera uztea erabaki duten arren, jai egitaraua bere horretan mantenduko da.
Beste guztia berdin
Azken urte hauetan Jai Komisioak lan handia egin du Aratusteak suspertzeko, eta, herri bazkari bazkaririk gabe bada ere, jendea kalera irteteko gonbita egin du Aratusteetako Jai Komisioak: "Pregoia, desfilea... eta guztiaren gainetik umore ona". Eguerdiko otordu popularrik gabe bada ere, azken urteotan indarra hartu duen festa ez da bertan behera geratuko.
Seguruenez, askok herri bazkaria elkarte bazkariz mozorrotu eta eguna bere horretan ospatuko dute.