'Kibubu', keinu bidezko antzezlana etzi Arrasateko Amaia antzokian

Familia osoarendako antzezlan interesgarria ikusteko aukera izango da etzi, hilak 11, Arrasateko Amaia antzokian (17:00). 'Kibubu' du izenburu obrak, eta Marie de Jongh zigilu artistikoak –Tartean antzerki taldeak kudeatzen du– Bilboko Alhondigan estreinatu zuen abenduaren 29an. Testurik gabeko obra da, keinu bidezkoa. 50 minutu irauten du eta sarrerak Arrasateko Udalaren webgunean daude salgai bost eurotan.

Antzezlanak Xebas eta Coco pailazo bikotearen proiektu berria du abiapuntu. Pailazoak dira biak eta ilusioa gainezka duten arren oraindik ez dute arrakasta nabarmenik lortu. Ikuskizun berria prestatzen ari direla, Xebasek benetako gorila bat erostea erabakiko du, bere aurrezki guztiak xahutuz. Izan ere, sinestuta dago gorila mendean hartu eta euren emanaldiak erakutsiz gero, sekulako txalo zaparrada jasoko duela. Baina Kibubu ez da ikusle erraza izango: eszeptikoa da, hainbat jabe izan dituena eta beste horrenbeste zirko eta zoologikotatik pasatakoa. Coco, bestalde, izututa dago hasieran gorilaren presentziarekin eta horregatik kaiola erraldoi baten izango dute preso.  

Antzezlana, antzezlanaren barruan

Kibuburen aurrean Xebasek egiten dituen antzezpenek ez dute arrakastarik izango. Animalia mendean hartzeko zailtasunez aparte, gorilak ez du laguntzeko asmorik erakusten eta horregatik Xebas hura zigortzen hasten da; orduan Kibubuk, ordura arte erakutsi gabeko indarra erabiliz, Xebas zaurituko du, fisikoki zein psikologikoki. Orduan Coco Kibuburekin erlazionatzen hasiko da, musikaren bidez. Harremanetarako modu berri bat aurkituko dute horrela, Kibubu oso alaia eta gizakien imitatzaile ederra dela konturatzeraino.

Xebas Kibuburekin obra ikusgarri bat egiteko gai dela ohartuko da; beraz, munduko pertsona zoriontsuena da. Baina estreinaldi handiaren egunean Kibubuk ihes egingo du...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.