Fagor Taldeko hiru kooperatibak, Onnerak (Fagor Industrial), Fagor Arrasatek eta Fagor Electronicak, ezohiko batzar orokorra egin zuten joan den eguenean, abenduko aparteko ordainsariarekin zer egin erabakitzeko. Bada, Fagor Arrasatek eta Fagor Electronicak ordainsaria kapitalizatzea erabaki zuten, eta Onnera Group-ek, berriz, kobratzea.
Fagor Arrasateko batzar orokorrera bazkideen erdiak baino gutxiago joan ziren –780 zeuden deituta eta 363 agertu ziren–, eta oso marjin txikiarekin onartu zuten abenduko ordainsaria ez kobratzea: botoen %52,25ekin, hain zuzen ere. 22 botoren aldea egon zen. Bazkideek ez dakite zertarako erabiliko den diru hori.
Fagor Electronicaren kasuan, marjina handiagoa izan zen: joandako bazkideen %66,2 agertu ziren aparteko paga kapitalizatzearen alde. Fagor Electronicak harreman handi samarra zuen Fagor Etxetresnekin, etxetresnendako osagarri elektronikoak egiten zituelako.
