ELA, LAB, STEE/EILAS eta ESK sindikatuek deituta elkarretaratzeak egin dituzte gaur arratsaldean herri eskolako guraso zein irakasleek, Wert Legearen eta hezkuntzan emango diren murrizketak salatzeko. Arrasateko Herri eskolako hiru guneetan egin dira mobilizazioak Bedoñaben, Erguiñen eta Musakolan.
Murrizketarik Ez!!! Benetako Negoziazio Orain lelopean egin dute elkarretaratzea. Baliabide gehiago egotea ikastetxetan, ordezkoen lan baldintzak hobetzea, lanpostuen egonkortasuna bermatzea eta ordezkapenak lehen egunetik egotea izan dira aldarrikapen nagusienak. Honekin lotuta, ikastetxeko irakasleek kartel batzuk erakutsi dituzte beraien eskaerekin.
Iker Elexpuru Erguineko irakasleak aipatu duenez "Hezkuntzan egingo diren murrizketek, ondorio negatiboak ekarriko dituzte ikastetxeko antolaketetan eta honek hezkuntzaren kalitatea jaitsiko du". Lan baldintzetan "atzerapauso" garrantzitsua emango dela eta "orain dela 40 urteko egoerara bueltatuko gara" aipatu du Elexpuruk.
