Oso partidu korapilatsua izan da. Joko berdindua gailendu da norgehiagoka guztian zehar; ez da gol kopuruan alde nabarmenik egon bi taldeen artean. Hasierako minutuak nahiko lasaiak izan dira: apurka-apurka markagailuan puntuak gehitzen joan dira, baina, denborak aurreka egin ahala, tentsioa arnas zitekeen. 14-13ko emaitzarekin joan dira atsedenaldira, lehenengo zatia amaituta eta 22 punturekin berdinduta zeudela amaitu dapartidua. Azkenengo minutuak izan dira gogorrenak eta erabakigarrienak: Donostiakoak aurretik zihoazela gol baten aldearekin, bailarako taldeak aurre hartzen jakin du, ikusle debagoiendarren pozerako.
Orokorrean, oso joko polita eta bizia egin dute bi taldeek eta ez da partidu samurra izan inorentzako: bistakoa izan da eraso jokaldietan oinarritu dituztela euren taktikak.
Zarauztarren aurrean, porrota
Gaur goizekoaz gain, beste hitzordu bat ere izan zuten Pablo Garciaren mutilek, egubakoitzean: Euskadiko Koparen baitan, Zarautzeko Amenabar ZKE taldearen aurka jokatu zuten Iturripen. Hau aldiz, ez zen partidu atsegina izan etxekoentzat, 23-28 galdu zuten-eta, tamalez.
Hala ere, kontuan izatekoa da zarauztarren taldea Ohorezko B mailan jokatzen duen taldea dela; Ford Mugarri baino maila goragoan.
Datorren astean azkenengoen aurka
Aste honetan izango da Eskubaloiko Ligako 2013ko azken jardunaldia eta talde arrasatearrari kanpoan jokatzea tokatzen zaio; Getxora joango da Erromoko Eskubaloia taldearen aurka jokatzera, zapatuan, hilaren 14an.
Nahiz eta kanpoan jokatu, ez dute oso zail izango Arrasatekoek talde getxotarra menderatzeko: izan ere, azken postuan doa Getxo sailkapenean, puntu bakarra eskuratuta.