2010eko urritik utzita dago fabrika zaharra eta ordutik hainbat arazo izan dira. Auzotarrak askotan kexatu izan dira; sute bat 2012ko irailean, argi barik ere geratu ziren bi kale... Era berean, instalakuntzak utzita egoteak eta hirugarren pertsonen "desegite etengabeek" eraikinaren segurtasuna arriskuan jarri dute eta beraz, baita bertan egon daitezkeen herritarren osasuna ere.
San Andres Berri erantzule
Horregatik Udalak dagozkion neurriak hartu behar ditu gunea hustu eta eraikinaren berehalako erortzea ekiditeko. San Andres Berri izango litzateke bertan eman daitezkeen kalteen erantzule eta enpresak ordaindu beharko lituzke eraikina modu kontrolatu baten eraitsi beharko balitz, horiek guztiak gauzatzeko lanak: eraispenak eragindako hondakinak kudeatzea eta kutsadura posibleak aztertzea –kutsadura industriala, materiala eta lurrazalekoa zein lur azpikoa–.
Hirigintza batzordearen arabera, eraikinaren egoera hain da txarra zaharberritze proiektu baterako ere ezin dela aprobetxatu. Hala, Udaleko teknikariek ondorioztatu dute eraikinak ez duela inongo baliorik. Horregatik ulertzen dute Polmetasa zaharra legalki hondamen egoeran dagoela.