"PP alderdiak daukan gehiengo osoari esker", barikuan Espainiako Senatuan onartuko duten LOMCE legearen aurkako "borroka eguna" deitu dute Ikasle Abertzaleek, lanuzte eta mobilizazioekin. Eguenean, azaroak 21, Seber Altube plazan hasiko da manifestazioa 12:30ean.
Lege atzerakoia
Ikasle Abertzaleek salatzen dute "ikasgai nagusien eduki osoa Madrilen esku" geratuko dela eta, ondorioz, kanpo geratuko dela "Euskal Herriko Historia eta Geografiatik" zegoen "apurra". Ikasgaiei dagokienez, salatzen dute "Erlijioa beste ikasgaien mailan" jarriko duela lege berriak eta "Euskara Musikaren mailan geratuko", espezialitateko ikasgai bezala. Lege berriak sexu bereizketan sustatuko duela ere salatzen du ikasleen erakundeak, "sexuaren araberako bereizketa egiten duten ikastetxeak diru publikoz lagundu ahal" izango baitira.