Maria Jose Iriarte izango da lehen gonbidatua: "Bere espezialitatea palinologia da, polena ikertzen du. Polenak nolako flora dagoen zehazten du eta beraz, historiaurretik hasita gure paisaiak eta klimak izan zuten bilakaera kontatuko digu. Arrasate eta inguruetako flora, eta ondorioz fauna nola aldatu zen azalduko digu".
1448ko erreketa, detaileekin
Jose Angel Achon izango da bigarren hizlaria: "Arrasate eta Oñatiko kondearen arteko liskarrak ederto kontrolatzen ditu. Arrasateren erreketaz asko egin da berba baina Achonek xehetasun guztiekin egingo du berba; batailaren azalpen zehatza egingo du". Bigarren saioaren ostean astebeteko atsedena hartuko dute eta abenduaren 10ean Alfredo Morazak egingo du berba: "Markuleteko Teilerixe baserriko eta Zigarrolako Aranguren teileriak izango ditu hizpide bereziki. Teilerietan nola egiten zen lan, zer ekoizten zuten, materiala nondik ateratzen zuten, garraioa... hainbat xehetasun emango ditu".
Maria Ines Olaran izango da zikloa ixtearen arduraduna: "Arrasaten jaiotako Ricardo Olaran Añibarro arkitekto ezagunaren alaba da. Curriculum handiko emakumea da eta aitaren gainean egingo digu berba, industria-arkitekturan izen garrantzitsua izan zen-eta. Biteri plaza egokitu zenean bota zuten Garibaien omenezko monolitoa eraiki zuen, besteak beste".
Egitaraua
Maria Jose Iriarte: Historiaurreko klimaren eta paisaiaren bilakera. Azaroaren 19an.
Jose Angel Achon: Arrasateko herria eta Oñatiko konderria 1448an. Azaroaren 26an.
Alfredo Moraza: Arrasateko teileriak. Abenduaren 10ean.
Maria Ines Olaran: Ricardo Olaran Añibarro arkitektoaren gainean egingo du berba, haren aita. Abenduaren 17an.
Oharra: Hitzaldi guztiak gaztelaniaz izango dira. Kulturateko areto nagusian, 19:00etan hasita.