Paco Gartzia zinegotzi sozialistak prentsa ohar bidez adierazi duenez, "banaketa guztiz neurrigabea da, herri txikien alde eginez eta herri handiagoak, biztanleria eta karga handiagoekin, gutxietsiz", horrez gain, Bildu eta EAJren arteko akordio honek, "Arrasate zigortzen du" salatu du. Oinarrizko Toki Araubidearen legeak azaltzen duenez, "herri handienek gizarte zerbitzuak eskaintzera behartuta daude, eta horrek gastu publikoa areagotu egiten du".
Bozeramaile sozialistak Elgetako kasua aipatu du: "1.120 herritarrekin 41 euroko jasoko ditu biztanleko, Arrasaten aldiz 22.000 biztanle izan arren, ez gara 6 eurotara iritsiko". Gainera alderdi sozialistak egindako proposamena, "ez aztertu izana" salatu du. Proposamen horretan, gizarte zerbitzuak kudeatzeko 2 milioi estrako partida bat bideratzeko proposamena ageri zen.
Bere ustez diru honen banaketa biztanleriaren arabera egin beharko litzateke, "herri bakoitzari gutxienezko lineal bat bermatuz". Gauzak honela, Arrasatek 127.918 euro jaso beharrean 220.129 euro jasoko lituzke. Gartziaren ustez: "Bildu eta EAJk berdintasun eta proportzionaltasun irizpideekin jokatzeko beste aukera bat galdu dute".