Grumal SL-ko langileek 11:30erako deitu dute kale-bilkura, eta ordu bete iraungo du horrek. Langileek esaten dutenez, "ezin da" onartu "tamaina honetako sarraskia eragin ondoren [Fagor] Korporazioak txintik ez esatea".
Honakoa gaineratu dute: "Fagor Elektrodomestikosen porrota ez da ezinbestean jasan behar genuen emaitza. Eta erabaki okerrak hartu dituzten zuzendariak ezin dute ezkutuan jarraitu behar, Grumaleko langilei, sozioei, eta gizarte osoari bizkarra emanez".
Gaur, kale-agerraldia Basaurin
Bestelako protesta mobilizaziorik ere badago. Gaur, eguena, arratsaldean Basaurin egingo dute kale-agerraldia, Edesako lantegitik abiatuta. Arrasatetik autobusez joango dira Fagor Etxetresnetako hainbat langile. Bestalde, Edesan ekonomikoki kaltetutako langileek batzarra iragarri dute gaur arratsalderako, Basauriko kultur etxean, eta "edozein kapital motarengatik" kaltea duten guztiei dei egin diete bertara joateko.