Goikobalu Abesbatza, Arrasate Musikal eta Txorbela Otxotea izan ziren besteak beste Harremanen urteurrena girotzeko ardura hartu zuten taldeak. Antolatzaileak pozik zeuden Amaia Antzokira gerturatu zen jendeaz, Harremanen ibilbidea bertatik bertara ikusteko aukera izan zutelako. Festaren helburu nagusia, sortzaileei, kolaboratzaileei eta laguntzaileei eskerrak ematea zen; Javi Ruiz de Munian-en arabera, "euren gabe Harreman ez zelako posible izango".
Musika, dantza eta bideo proiekzioak
Goikobalu Abesbatzak eman zion hasiera Vanesa Sanchez, Eitb-ko aurkezleak, gidatutako saioari. Ondoren, 20 urteetan egindako proiektuen errepasoa egin zuten; gaztetxoen dantzek taula hartu aurretik. Ankur umezurztegiak eta Mozambiken egiten dabiltzan proiektuen bideoak ere proiektatu zituzten, eta Txorbela Otxotearen emanaldiaren ondoren, loreak banatu zituzten laguntzaileei.
Beste hogei urterako prest
Harremanekoek balorazio oso positiboa egin zuten, " oso polita izan da ondoan izan ditugun laguntzaileak ikustea eta eskerrak eman ahal izatea", horrez gain " gazte asko egon dira Amaia Antzokian eta pozgarria da oso, hezkuntza aldetik ere txikitatik ikasten dutelako zer den kooperazioa". Argi dagoena da, azken 20 urteetan egindakoaren ondoren, lanean jarraitzeko gogoa izaten jarraitzen dutela.