Arregiren eskulturak puzzleak dira; izan ere, piezak banaka sortzen ditu, eta ondoren, bata bestearekin lotzen ditu. “Nire sortzeko moduak mugatua dela dirudi, baina urteak daramatzat horrela, eta geroz eta gehiago konplikatzen da”, aipatu du egileak.
Askotan, eraikinetan inspiratzen da Arregi, eta haren lanek duten bertikaltasunean erraz ikus daiteke erreferentzia hori: "Bertikaltasunaz gain, nire lanak eratzeko modua ere oso arkitektonikoa da eta nire lanek dituzten bao eta espazioek leiho edo ate itxura ere izan dezakete". Arregik beti formatu handiko obra sortzeko asmoa duen arren, Donostiako gehienak txikiak dira.
Erakusketa abenduaren 7a arte egongo da ikusgai. Martitzenetik zapatura bisita daiteke, 11:30etik 13:30era eta 17:30etik 21:00etara.
Lan bidaiariak
Arrasateko artistak ospe handia lortu du, eta haren lanak munduko azoka garrantzitsuenetan egon dira. "Lanak Koloniatik Donostiara ekarri dituzte eta aste bukaera honetan Istanbulen erakutsiko dituzte", aipatu du Arregik.