Donostiako Correos taldea langilea eta, aldi berean, umoretsua da. Iraupen laburreko hainbat lan kaleratu ostean, La Oreja de Van Gogh taldeak urte batzuk lehenago egin zuen moduan, 2009an Donostiako Pop-rock lehiaketa irabazi zuten. Urtebete geroago, eta bertan lortutako izen onari esker, 2010ean iraupen luzeko No es lo que parece diskoa grabatu zuten Iker Piedrafitarekin. Hari esker, Espainiako jaialdi garrantzitsu askotan kontzertuak egin zituzten. Urte gutxiren buruan industrian euren tokitxoa lortzeaz gainera, soinu propioa izatea ere lortu dute.
Diskoetxe eta soinu berria
Orain, Warner Music-ekin kaleratu duten Esponjas para bañar el horizonte izeneko disko berriarekin datoz, RTVEko Los conciertos de Radio 3-en ere aurkeztu dutena. Iñaki de Lucasekin grabatu duten lanean, dotoretasunez landutako elektronika, baxu distortsionatuak, power-popa eta estribillo ugari aurki daitezke.
Kooltur-zaleek talde berezi bat ezagutuko dute, eta zale ez direnek, talde berritzaile bat ezagutzeaz gain, gaztetxeko ostegun bereziak ezagutuko dituzte.