Astelehenean, Besaide elkartearen Mendi Hamabostaldiaren barruan, Kulturaten egon zen Zubizarreta iazko abentura azaltzen: "Buenos Airesetik zuzenean joan ginen El Chaltenera. Herri txiki bat da El Chalten, eta handik hainbat mendi egin daitezke. Guk bi egin genituen, Aguja Poincenot eta Cerro Torre".
(Zubizarreta eta Aranburu Cerro Torreko gailurrean)
Elurra, izotza eta haitza
Elur-eskalada zein eskalada mistoa tartekatu zituzten: "Piolet eta kranpoiekin igo genituen, elurra, izotza eta haitza tarteko". Esperientzia ederra izan zela gaineratu digu: "Oso positiboa izan zen. Lehen aldian joan eta Cerro Torre igotzea loteria tokatzea baino zailagoa da. Zortea izan genuen, eguraldi oso ona eta beraz, oso baldintza egokiak. Han baldintzak ez badira onak ez zara herritik irteten. Aukera aprobetxatu genuen; oso pozik gaude". Etorkizun hurbilerako ez du beste mendirik buruan: "Gogo handiak ditut mendira joateko baina ez dut ezer zehatzik buruan".
(Zubizarreta Cerro Torre tontorrerako azken horma ikusgarria parean duela)
Orientazio raid-a eta irteera
Besaide elkartearen Mendi Hamabostaldiarekin amaitzeko, zapatuan umeendako orientazio raid bat egingo dute Monterron parkean (10:00) eta domekan mendi martxa herrikoia egingo dute Udalatxera. 09:00etan irtengo dira Monterronetik.
(Igoera bertikalaren tarte luzeetako bat)