Abuztuan eragindako kalteen artean, honakoen berri eman zen azken Tokiko Gobernu Batzarrean: su-itzalgailuak lokal osoan zehar hustu zituzten eta beraz, bertan zeuden manta, toalla, almoada, koltxoi, altzari maindire eta arropa guztiak su-itzalgailu horien produktuaz zikindu zituzten. Era berean, zabor poltsak sartu zituzten, bi berogailu elektriko ostu, instalakuntza elektrikoa kaltetu eta dutxetan zein komunetan beste hainbat kalte eragin.
Garbitu eta egokitzeak, 2.600 euroko gastua
Peritoak kalteak aztertu ondoren, segurutik 2.421 euro kobratuko dela jakinarazi zuen urriaren 14an, kopuru horretan zehazki zein kalte eta konponketa sarturik dauden argitu ez badute ere . Baina kontuan hartuta neguko aterpetxea azaroaren 4an ireki gura dela eta garbiketa ahalik eta azkarren egitea komeni dela, honakoa onartu zen tokiko batzarrean: lokalaren garbiketarako Ausolanek aurkeztutako 1.609 euroko aurrekontua –BEZ barne– onartzea eta aterpetxerako bi berogailu eta gortina erosteko 1.000 euroko baimena ematea. Beraz, abuztuan eragindako kalteek Udalari 2.600 euroko gastua suposatuko die.