Ataunen izandako bileran datorren urteko jarduera-egitaraua aztertu zuen patronatuak: On Jose Miguel Barandiaran jaio zela 125 urte beteko dira 2014an eta fundazioak efemeride horren inguruan garatuko du bere egitasmo nagusia.
Jose Miguel de Barandiaran Fundazioaren helburuak dira:
- Jose Miguel Barandiaran jaunaren lan ugari eta zabala sistematikoki biltzea.
- Bere zientzia produkzioaren argitalpen kritiko zaindua bultzatzea.
- Bere bizitza, pentsakizun eta zientzia eta kulturari egindako ekarpena aztertzea, obra nazio eta nazioarte mailan zabalduz.
- Jose Miguel Barandiaran jaunak bere bizitza osoan zehar hasi eta jarraitu zuen Euskal Herriko Atlas Etnografikoaren ikerketa lanak jarraitzea.
- Euskal Herrian, Baskonia mailan, berak landu dituen gaietan ikerketa-egitarau eta bekak bultzatzea.
- Ikastaldi, mintegi, hitzaldi edo antzeko ekintzak sortzea, eta erakundeak bultzatutako ikerketa eta azterketen emaitzak argitaratzea.