Mondrako neskek Lezaman jokatuko dute bihar

Mondrako neskek, Emakumezkoen Bigarren Mailan jokatzen duten bigarren denboraldi honetan, bost partidu jokatu dituzte. Guztiak galdu dituzte, gol bakarra sartu eta 34 jaso. Aste bukaera honetako partidua bihar jokatuko dute Lezaman, Athletic B taldearen aurka (17:00). Bilboko taldea hirugarrena da sailkapenean. Mondra, berriz, azkena.

Datu deigarriak dira eta Andoni Ezkurrak azaldu digu zein den, haren ustez, gainbeheraren arrazoia: "Iaz gazteenak ziren jokalariak bakarrik geratu dira, bost edo sei jokalari. Gainerako guztiek taldea utzi dute. Taldea mantentzea bera ere kili-kolo egon zen, jokalari faltagatik. Azkenean, gazte mailakoekin osatu da taldea". Azken hiru urteetan entrenatzaile moduan aritu da Ezkurra; orain bertan, Fernando Uranga entrenatzailearen laguntzailea da.

"Oso handia" da aldea

"Oso talde gaztea da eta argi dute aurtengoa formaziorako denboraldia izango dela. Partidu gehienetan hainbat gol jasoko dituzte eta horretarako mentalizatuta daude", gaineratu du Ezkurrak. Partidu bakarra jarraitu du talde berriarekin baina nahikoa izan da harendako taldeen artean dagoen aldea "oso handia" dela ikusteko: "Asteburu honetan Lezaman ere zakukada ederra jasoko dute".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.