Aurkariaren gainean honakoa uste du Gartziak: "Oso talde ona da, azken jardunaldian lehen sailkatua garaitu zuten, eta beraz, zaila izango da irabaztea".
Defentsan are gehiago hobetu
Taldea bide onean doala uste du entrenatzaile oñatiarrak: "Apurka hobetzen ari gara, taldearen bilakaera ona dela esango nuke. Hori bai, oraindik asko dago hobetzeko. Denboraldia oso luzea da eta ezin gara erlaxatu". Izan ere, Lehen Nazional Mailan ez dago erlaxatzerik: "Konturatu gara liga honetan edozein taldek irabaz dezakeela, talde guztiek maila berdintsua dutela". Erasoko jokoan oso jokalari trebeak ditu Ford Mugarrik baina defentsako lana erasokoa bezain garrantzitsua da maila honetan, Gartziaren arabera: "Defentsan hobetu dugu bai, baina hobetzeko asko dugu oraindik".
Kantxaren egoera auzian
Bestalde, kirol arlotik haratago, Iturripeko kantxa izan da Arrasate Eskubaloi Taldearen kexa nagusia denboraldia hasi zenetik. Oso labainkor egon dela salatu izan dute. Azken egunotan kantxaren egoera hobetzeko lanean aritu dira baina Gartziak ezin du egoera hobetu den azaldu, martitzenean entrenamendua Aretxabaletan izan zuelako. Gaurko saioan ziurtatu ahalko dute kantxaren egoerak hobera egin duen edo ez.