Kooperatibaren egoera industria-arloko ekimenik ezari eta politika zehatz batzuei egozten die. Ainhoa Etxaide idazkari nagusiak zehaztu duenez, sindikatuek ez dute ordezkaritzarik Fagor Etxetresnetan, baina, hala eta guztiz ere, "arazoaren parte" direla eta "ondorioz, konponbidearen parte ere" izan gura dutela azaldu du. Gaineratu du egoerak "eskualdeari, Gipuzkoa osoari eta mendeko industria askori eta komertzioari" eragingo diola.
Etxaiderentzat, egoera honek ez du kolokan jartzen kooperatibismoa bera eta "erori dena estrategia zehatz bat, errealitate bat" izan da, harentzat. Estrategia industriala aldatu eta haren aldeko apustu baten alde egin du LAB sindikatuko idazkari nagusiak, Industriaren Mahaia berreskuratu beharko litzatekeela argudiatuz. Industrian inbertitzeko estrategia baten eta enpresarien eskuetan dirua ipintzearekin zerikusirik ez duten politika publikoen alde azaldu da, baina halako jarrerarik ez duela inongo erakundetan ikusten, "ez Aldundian, ezta Jaurlaritzan ere", gaineratu du.
