Apirilean aurkeztu zuten Julio Galarta Pintorearen Lagunak Elkartea eta hau da egingo duten lehen erakusketa. Jose Mari Velez de Mendizabal elkarteko presidenteak adierazi du erakusketa Arrasaten izanik, horixe hartu dutela gaitzat. Hala, Arrasateko txoko ezberdinak ikusi daitezke erakusketan dauden Julio Galartaren artelanetan: kaleko txokoak zein baserri girokoak. Guztira 18 koadro daude Arregi Arte aretoan ikusgai.
Erakusketako helburuetako bat Galartaren lana ezagutzera ematea da, eta bestea, dirua batzea. Salgai jarriko dituzte Galartaren artelanetako batzuk. Batutako dirua artistaren obra ikertzeko erabiliko da.
Erakusketa eguenean inauguratuko dute 19:00etan eta zabalik izango da azaroaren 17ra arte.