Jai giroan egin dute Irati Libre Eguna

Datorren eguenean hasiko den Herriko tabernen aurkako makroepaiketa salatu eta Irati tabernari babesa emateko ekintzaz beteriko arratsaldea antolatu dute gaurko Ferrerias kalean, Irati tabernaren kanpoan zein barruan. 

Haurrak izan dira ekitaldiez gozatzen lehenak, eta euriak hala behartuta, marrazkiak egin dituzte Irati tabernan. Bien bitartean, tabernako beste mahai batean aurpegiak margotu dizkiete umeei.

19:00etarako jende ugari batu da Ferrerias kalean, bertan salgai zeuden gazta pintxoez eta ardoaz gozatzeko. Epaiketaren harira sortuko diren gastuei aurre egin ahal izateko arropa ere jarri dute salgai. Tabernaren barrualdean, berriz, mahai-futbol txapelketa egin dute.

Herritarren babesa eskertu dute

Albokarien eta txalapartarien doinuen ostean eman diote hasiera ekitaldiari. Orain artean izandako beste makroepaiketa batzuk gogora ekarri dituzte eta Herriko tabernen aurkako makroepaiketa hau luzea izatea aurreikusten dutela iragarri dute. Herritarrei, emandako babesa eskertu diete.

Era berean, gogoan izan dituzte astelehenetik aurrera Segiren aurkako epaiketan auzipetutako gazteak eta bereziki Aramaion bizi den Irati Muxika.

Bertaratutakoei afaritarako gonbita ere zabaldu diete.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.