Ekain Zubizarretak 31 urte ditu eta Arrasateko alkate ohi Xabier Zubizarretaren semea da. Anger Arrasateko musika taldeko baxu-jotzailea da –15 urte daramatza bertan jotzen–, Maritxu Kajoi komisiñuan lanean ibiltakoa eta Txatxilipurdiko administrari ohia.
Zubizarretarekin batera beste 17 lagun atxilotu dituzte operazio berean: hamar, Herrira Hernaniko egoitzan egiten ari zen batzarrean; eta gainerako zortzietatik bost Gipuzkoan, eta bana Araban, Bizkaian eta Nafarroan.
Gaurko polizia operazioa Estrasburgoko Giza Eskubideen Epaitegiak Parot doktrinaren inguruan hartu behar duen erabakiarekin lotu du Herrira-k; "Espainiako Estatuak bake prozesuaren aurrean duen jarrera" erakusten du, bere esanetan; eta "bake prozesuaren alde egin duten lana kriminalizatu" nahi dutela salatu du. Hala jaso du Berria egunkariak, presoen eskubideen aldeko kolektiboak kaleratutako ohar bati erreferentzia eginez.
Eloy Velasco epailearen aginduz egin dute operazioa. Egoitzak ixteko agindua eman du epaileak, eta bankuetako eta sare sozialetako kontuak blokeatzeko.
Agerraldi bat egin du Jorge Fernandez Diaz Espainiako Barne ministroak, operazioaren berri emateko. Fernandez Diazen esanetan, Herrira-k "bere egin ditu Amnistiaren Aldeko Mugimenduaren helburuak, egitura, funtzioak, metodoak, finantzaketa erak, ikonografia eta sare komunikatiboa". Horrek "agerian" uzten du Herrira AAMren oinordekoa dela, Fernandez Diazen arabera. "ETAko kideen omenaldiak antolatzea" leporatzen die Guardia Zibilak atxilotuei.
EiTBren arabera, Gipuzkoako ahaldun nagusi Martin Garitanok eskandalu antidemokratikotzat jo ditu atxiloketak; eta Eusko Jaurlaritzako bozeramaile Josu Erkorekak Twitterren adierazi duenez, "Herriraren aurkako operazioa albiste txarra da, euskal gizarteak ulertzen ez duen atzerapausoa".