Saiheskiak, sagardoa eta liburuak, euskarari laguntzeko

Azoken eguna izan da gaur Arrasaten: Birzikleta, baserritarren azoka, eta Zahar Berri eta AEDren bigarren eskuko materialaren azoka. Hirugarren horretan ere jende dezente ibili da gaur goiz osoan. Arrakasta izan dute azokan salgai zituzten liburuak eta baita saiheski-pintxo eta sagardoak ere.

55 kilo saiheski zituzten euro baten truke salgai, eta eguerdirako ia dena bukatuta zegoen. Ardoa ez du hainbeste jendek eskatu, baina sagardoa askok edan dute gustura. Agirretxek emandako Giokela haragizko pintxoak ziren.

Zahar Berri egitasmoari –Udal Euskaltegiak, AEK-k eta AEDk bultzatuta– eta AED elkarteari laguntzeko azoka eta pintxo-jana ziren, eta gustura zeuden arduradunak, herritarrek ondo erantzun dutelako: "Material asko izan dugu azokan, oso liburu berriak, gainera; eta Agirretxek haragia eskaini du AEDri laguntzeko", esan digu AEDko Itxaro Artolak.

Ekintza horietatik atera duten dirua AEDren eta Zahar Berriren urteko jarduna finantzatzeko da, biek ere euskararen alde ohiko lana egin ahal izateko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.