Manifestazio jendetsua izan zen atzo 20:30etan Arrasateko alde zaharrean egin zutena. Elkartasun Egunaren egitarauko ekitaldi nagusia zen, eta arrasatearren ez zuten hutsik egin. Ehunka eztarrik preso eta errefuxiatuei elkartasuna adierazi zieten eta oraindik ere egiteko lan asko dagoela aldarrikatu zuten.
Gaztetxean kontzertua
Goraino bete zen hasieratik Arrasateko gaztetxea Elkartasun Egunari amaiera paregabea emateko. Azken urteetan gaueko kontzertuak indarra galdu zuela zirudien arren, zapatuan indarberrituta amaitu zuen, etxeko taldeei parada emanez.
Kontzertu ezohikoa izan zen; aspaldian ikusteke zegoen Kañeria 13; Anger, pop, rock zein metal klasikoak jotzen eta Dirty Kontrol Brothers, Des-Kontrol eta Dirty Brothers taldeko kideekin.
Anaitasuna gure arma
Dirty Brothers izan zen oholtzara igo zen lehenengo taldea eta indartsu hasi zuten gaua, taldearen klasiko bihurtu diren kantuak bata bestearen atzetik jaurtitzen. Hala ere, pixkanaka Dirty Kontrol Brothers bilakatu zen laukotea. Des-Kontroleko Magu, Pepin eta Magulin-ekin Burua hotz eta bihotza bero, Beti elkarrekin edo presoei eskainitako Duintasunez eutsi jo zituzten. Publikoak ondo baino hobeto erantzun zuen, askorentzako aspaldian ikusi ez duten momentua heldu zelako, anaitasuna eta musika bat eginda.
Garagartza 'Stihl' rock
Kañeria 13, 90 hamarkadan hasi zirenetako talde berezienetako bat da, punk-a eta rock and roll-a ezin hobeto nahasten dituen makina. Zapatuan berriz ere argi utzi zuten; errege artean errege. Maketako zein Miles de historias diskoko kantuek zoramena ekarri zuten ikusle gazte eta ez hain gazteen artean.
Goatekea eta conga
Dantzarako parada egon zen zapatuan ere. Anger-en alter-egoak amaitu zuen gaua, oraingoan teklatu eta guzti 80ko hamarkadako pop, rock zein metal kantuak joaz. Besteak beste, Alaska, Tequila edo La Orquesta Mondragon pasatu ziren gaztetxetik. Ikusleak conga egiten jarri zituzten!