Askapenako Xabi Llodiok adierazi du Siria ez dela eraso hau jasan duen herrialde bakarra, azken urteetan Libian sartu direla, eta asmoa zutela Somalia, Sudan, Libano eta Egipton ere sartzeko, eta eraso inperialistatzat jotzen dutela "potentzia inperialista eta kapitalisten saiakera bat" delako "euren nagusitasuna munduan ezartzeko".
"Amerikako Estatu Batuak ez dira inor interbentzio militar hau aurrera eramateko Siriak arma kimikoak erabili izanaren aitzakipean, eurak izan baitira arma kimikoak erabiltzen nagusi mundu mailan historikoki", azaldu digu. Eta horri gehitu dio eurek ez dutela datu zehatzik eta ez dakitela Siriako gobernuak arma kimikoak erabili dituen, baina Arrasaten egindako kontzentrazioa ez dela izan Bashar Al-Asaden gobernua eta erregimena babesteko, eraso "inperialista" hau salatu eta Siriako herri langilearekin bat eginda joko "makabro" hau salatzeko baizik.
"Sistema politikoa erabat hankaz gora"
Erasoarekin aurrera egingo ote duten galdetuta, Askapenatik ez dute zalantzarik: "Bada denbora bat Siria erasotzen hasi zirela maila militar, kultural eta politikoan, eta orain beste pauso bat ematera doaz. Uste dugu inperialismoa momentu aproposaren zain dagoela eraso hau aurrera eramateko, eta unea iristen denean aurrera egingo dutela". Jada nahiko desestabilizatua dagoen sistema politiko bat erabat hankaz gora jartzea eta euren nagusitasuna zonalde horretan jaun eta jabe egitea ekarriko luke eraso horrek, euren esanetan.
"Askapenatik eta Euskal Herritik egin behar duguna da potentzia inperialista hauek salatu eta Espainia eta Frantziaren –NATO barruan egonik eta gure herria zapaltzen dutela kontuan izanik– jokaera salatu, baita AEBena, Europako Batasunarena eta Erresuma Batuarena ere", gehitu dute.