Gaurkoa da azken eguna lanean [uztailak 26]. Faltan igarriko duzu?
Zalantza barik. Bizitza osoa eskaini diot zapatagintzari. Gustuko duzun zerbait egiteari uzten diozunean, normala da faltan igartzea. Negozioak aurrera egitea gura dut, baina, alde horretatik, lasai nago. Izan ere, semeak nik baino hobeto eramango duela uste dut. Nire semearengan erabateko konfiantza daukat.
Irakasle ona izan duenik ezin ukatu...
Aita eta anaia oso zapatagile onak ziren eta nik haiengandik ikasi nuen. Ez naiz beste inor baino argiagoa, baina zapatekin lanean ari naizenean oso erraza egiten zait ona izatea. Zergatik? Txikitatik bizi izan dut eta ondo irteten zait. Gainera, lanean nagoenean, gozatu egiten dut. Semeari ere asko gustatzen zaio, eta horregatik ikusten dut nik baino askoz hobeto negozioarekin segitzeko. Zortzi urte daramatza nire ondoan lanean eta oso ondo ikasi du. Gainera, ni baino gazteagoa eta askoz argiagoa da.
Bistakoa da bezeroekin harreman estua duzula. Ondo haiekin?
Bezeroak dira izan dudan onena. Oso leialak izan dira eta beti baloratu naute oso ondo. Eskerrik beroenak eman gura dizkiet, guztiei.