Berramesten proiektua aintzat hartuz, haurren iritzia kontuan hartu dute ekintzak antolatzeko eta horrek, Juaristiren arabera, asko laguntzen du. Kalea berreskuratzea lortu dute: "Azken urteetan autoek irabazi dituzte kaleak eta saiatu gara haurrek berreskura zitzaten. Giroa sortu dugu Arrasateko gune ezberdinetan".
Negarrez, amaitu direlako
Udaleku itxietan Oriokoak dira arrakastatsuenak oraindik; aurten 12 eta 14 urte arteko 40 gaztetxo egon dira: "Oso talde kañeroa tokatu zaigu eta itzela izan da, mundu magiko bat eratu dugu Orion. Hezitzaileek esan digute gazte horiekin beste 30 egun egongo zirela. Gazteek negarrez amaitu zuten udalekuak bukatu zirenean; hori da seinale onena". Kosta ala Kosta udaleku ibiltaria ere "ederra" izan da; 23 neska izan dira guztira: "Asko ikasi dute, sekulako abentura izan da. Ukitu feminista eman diegu, gainera".
Bestalde, Musakolako igerilekuetako Freskura! ekimena abuztuaren 2ra arte luzatuko da; adin guztiendako, arratsaldez.