Malen Ruiz de Azuarentzako aurreneko txapelketa europarra izan da gaurkoa, eta probatu du estatu mailaz haratagoko lehiaketaren gogortasuna. Arrasatearrak bi garaiera saltatu ditu; gainditu duen aurreneko oztopoa 3,65 metrokoa izan da eta 3,80 metro saltatu ditu ondoren.
Hirugarren jauzian, 3,90 metrokoan zortea ez da arrasatearraren alde egon eta hala, bertan amaitu da atleta gaztearen gaurko Europako esperientzia.
"Ez da lehiaketa ona izan baina aurrera egin behar da". Hala azaldu du Twitter bitartez arrasatearrak, eta horrela jokatuko du. Hain zuzen ere, astelehenean itzuliko da Italia aldetik eta eguenean Madrilera bidaiatu beharko du, bertan jokatuko baita Espainiako Txapelketa Absoltua.
Denboraldiko azken lehiaketa izango da, "marka ona egiteko beste aukera bat izango dugu han", adierazi du. Zorte on!