Arrasatekoak ez du denboraldia nahi moduan hasi, lehenengo lagunartekoa —Mojategin— jokatu berritan etorri delako lesioa, zazpigarren ornoan haustura.
Atzo goizean, soka batzuekin ariketa batzuk egiten ari zenean hartu zuen min: soka horiek porteriara lotuta zeuden eta, ariketak egiten zebilela, gainera erori zitzaion porteria. Lepoaldeko zazpigarren ornoaren (bertebra) atzeko arkua hautsi zuen ondorioz eta luzerako joko du, medikuek tratamendu tradizionalaren aldeko erabakia hartu dute-eta. Hala, Arrasatekoak denboraldi hasierako partidu garrantzitsuak galduko ditu, besteak beste, Txapeldunen Ligarako aurre-fasekoak.
Zorte txarra
Ez du zorte onik Realak denboraldi hasiera honetan. Duela egun batzuk Diego Ifranek hautsi zuen belauna eta gaur, martitzena, egingo diote ebakuntza. Sei hilabete beharko ditu aurrelari uruguaiarrak sendatzeko.
Bestalde, Realeko ikur nagusia, Asier Illarramendi, ere galdu du Jagoba Arrasate entrenatzaile berriak. Hiru baja garrantzitsu dira itxaropentsua bezain gogorra izango den denboraldi berrirako. Mutrikuarra behin betirako galdu du eta Ifran ere kanporako bidean zen min hartu aurretik. Ea arrasatearra lehenbailehen osatzen den. Dena beharko du Realak.
Oraingoz, Miguel Angel eta Seferovic etorri dira taldea indartzera eta Jonathan Do Santos Bartzelonako mexikarraren atzetik dabil Reala.