Eguraldi ona albiste izan da aurten, izan ere, azken urteetan ez dute haren laguntasunik izan Al-Andalus eta beste elkarte batzuetakoek Errozioa ospatzeko. Aurten, erromesen ahotan izan dira eguraldi kontuak ere: "Beste urte batzuetan eguraldi kaskarra zelako eta aurten bero dagoelako, beti zeozer!", esaten zuten, umore onez. Edozein modutan, eguraldi onarekin askoz ikusgarriagoa izan zen erromesaldia, eta gustura abestu eta dantza egin ahal izan zioten Errozioko Ama Birjinari adin guztietako erromesek.
Arrasateko Al-Andalusekoez gain, Euskadiko beste elkarte batzuetakoek hartu zuten parte jaian: Andoaingo, Irungo, Santurtziko, Errenteriako eta beste herri batzuetako elkarteko kideak etorri ziren. Urrutikoenak Kantabriatik etorri ziren. Horiez gain, Corazon de Encina elkartekoek ere euren postua ipini zuten Arruena parkean.