Etxeko talde batek irekiko du Arrasateko Gaztetxeko gaua. Hain zuzen ere, 2011n sortu zen Drop! taldea izango da lehenengoa eszenatokira igotzen eta euren aurreneko diskoa aurkeztuko dute arrasatearren aurrean. Oraindik argitaratu ez badute ere, Ez Gaituzte Aldatuko diskoaren aurrerapena egingo dute taldekideek biharko emanaldian.
Paristik datozen artistak
Gaztetxeko oholtzara igoko den bigarren taldea, aldiz, The Great Divide izango da. Pariskoak udako kontzertuetan murgilduta daude eta Euskal Herrian emango duten saio bakarra izango da Arrasatekoa.
Boskotearen hardcore melodikoa entzuteko aukera egongo da, beraz, gaztetxean. Tales of Innocence and Experience izeneko bere aurreneko lana aurkeztuko dute; ingelesez kantatutako bederatzi abesti jasotzen dituen diskoa, hain zuzen ere.