Haurrek hartu dituzte Arrasateko kaleak, udaleku irekietan

Uztailak udalekuetarako garaia esan gura du Arrasateko zein bailarako hainbat haur eta gaztetxorendako; 2 eta 10 urte arteko haurrendako udaleku irekiak astelehenean hasi ziren. Aurten 234 umek eman dute izena, iaz baino 19 gutxiago. Berramesten ekimenari eutsiz, ekintzak haurren nahien arabera antolatzen saiatuko dira Txatxilipurdiko begiraleak, euren autonomia bultzatuz. Talde ezberdinetan banatuta, denetariko ekintzak egingo dituzte goizero, astelehenetik egubakoitzera. Gaur Biteri plazan harrapatu ditugu, herri kiroletarako gertu.